Serabana jalai alun mayuh belubang

BINTULU: Bala mensia mayuh ke nguan rumah panjai merinsa bendar pulai mansang nengah Jalai Ulu Sebauh ngagai simpang Jalai Bintulu-Sibu laban jalai nya balat endar belubang sereta jai ba mayuh alai endur.

Bisi 15 buah rumah panjai enggau sebuah sekula primari ba kandang menua nya ke sama nengah jalai nya kin kitu.

Sekeda bala tuai rumah ba kandang menua nya mega bisi udah minta Opis Parti Pesaka Bumiputera Bersatu (PBB) N60 Kemena nyaup sida betangkup enggau penanggul nya, laban meda jalai nya kena pegai kandang bepilih Kemena.

“Ku bala sida tuai rumah nya, pejalai ari Bintulu (ngena kerita) patut mina pengelama 40 minit aja, tang diatu kami nengah jalai nya ba ungkup pejalai ti sama bisi sejam lebih sebedau kami ulih datai ba rumah panjai kami,” ku Ketuai Pemadah PBB N60 Kemena, Nicholas Bat kemari.

Ku iya bala mensia ke gawa ba Bandar Bintulu mega bisi penanggul nemuai ke rumah panjai sida maya ujung minggu laban jalai ti balat jai.

Iya madah, jalai nya pedis bendar dikena enti ngena kerita mit baka Perodua Kancil laban iya baruh sereta mega kerita baruh bukai laban jalai nya kelalu mayuh lubang ti alai tayar kerita tau tepuruk. Lubang nya mega mayuh dalam, nya alai balat endar ngenanggul mensia mayuh ke nengah jalai nya.

“Kami minta raban orang enggau opis ti bisi kuasa ngambika siru ati nambun ngalitka lubang ba serantu jalai nya, ka tambah mega ngerataka jalai nya ngena lipan, awakka mudah ditengah kerita mit enggau besai,” ku Nicholas udah bekau tembu meresa gaya jalai alun nya kemari.