Chin bedanji mantu ngaga jalai nuju gerija di Bukit Kanada

MIRI: Pekara pasal jalai alun jai nuju Gerija Gospel Miri ba Bukit Kanada deka dibai ngagai agensi perintah. Menteri Industri Ladang enggau Komoditi Peter Chin Fah Kui mansutka jaku tu udah iya nemuai kia enggau pengari rayat KN Pujut Andy Chia, Datuk Bandar baru Miri Lawrence Lai, Sebastian Ting enggau bala ketuai gerija. Chin madah, projek ke dibantai kena ngentapka munggu nya deka begunaka ungkus RM300,000 lalu gerija nya setuju deka nanggung sebagi ari kos nya. “Ila aku begigaka bantu ari sekeda agensi udah pulai ari KL tembu pengerami Taun Baru China ,” ku iya. Chin madah Bukit Kanada ngelamatu ditemu suah tusur tanah, kelebih agi maya hari ujan tang gaya bekau deka tusur senentang jalai nya, balat ngirauka ati bala ketuai gerija enggau kaban iya mega. Lebih ari 1,000 bala orang ke semampai sembiyang ba gerija nya nengah jalai nya genap hari Minggu. Sebedau tu, jalai alun nya ditengah bala orang ke diau di Bukit Kanada, kelebih agi bala sida setinggan dia, tang semua sida tu udah pindah ari taun 2004, ngerumban maya Miri sebedau nyadi nengeri besai. Miri nyadi nengeri besai kena 20 Mei 2005. Chin madah, ungkus projek ngentapka tinting bukit nya deka mar mimit laban pengawa nya berat bendar.