Nama ‘Orang Ulu’ deka ditukar ngagai ‘Lun Daya’?

MIRI: Nama ‘Lun Daya’deka chun agi dikena laban nya ngayanka raban bansa Orang Ulu ti udah mansang sereta mayuh penemu enggau pengelandik sereta jauh maju dalam pendiau raban bansa enggau diri sebilik bebanding enggau menya.

Serakup Gerempung Orang Ulu Malaysia (FORUM) mantai penemu minta nama ‘Orang Ulu’ ngagai Lun Daya ke nyadi tanda siti pengeran ngenyulutka diri, mayuh penemu enggau pengeraja asal ba komuniti nya dalam konteks dunya moden tu.

Presiden Forum Lihan Jok, ke mega Kaban Kunsil Nengeri Telang Usan, madah nama Orang Ulu nya dikena orang menya laban kena nanda penyelaie raban bansa nya ari orang bukai, laban tebal agi sida berasal ari entigis menua ulu, sereta diau ba ulu siti-siti sungai.

Sekeda orang ngumbai ulu nya balat surut dalam pemansang, tauka raban bansa ti jauh tinggal dalam mayuh bengkah panga pemansang.

“Diatu ‘Orang Ulu’ enda tentu ngena agi dikena kitai ba konteks dunya moden tu. Mayuh ari sida nya udah bepindah pendiau ngagai nengeri sereta udah maju enggau mujur dalam mayuh bengkah panga pengawa, nyadi profesional ukai di menua kitai tu aja, tang di menua tasik mega,” ku Lihan sereta madah chunto ti ditemu mayuh nya baka ketuai eksekutif MAS Datuk Seri Idris Jala ti nyadi siku ari sida raban bansa nya udah berupai mujur.

Lihan madah, tebal agi bala raban intelek enggau ketuai raban bansa sida endang setuju magang enggau ubah nya (ngubah nama).

Peminta ubah tauka ‘motion’ nya deka dibantai sida dalam simposium ba bulan April taun tu. Udah nya bantai penemu nya deka dibai ngagai kabinet Menua ngambika dipejuraika, lalu dipesetuju, dikemendar tauka enda.

Serimbai enggau nya, Lihan minta raban nya nyengkaum serakup, kelab tauka gerempung sida ngena FORUM nyadika titi andau entara rayat enggau perintah. FORUM ulih nyadi penyurai ka raban bansa nya ngambika kering agi sereta inggar didinga.